പണ്ഡിതരെ വാർത്തെടുക്കാൻ ഒരു കലാലയം

ബഹുഭാഷാ പ്രാവീണ്യവും നേതൃപാടവവുമുള്ള പണ്ഡിതന്മാരെ വളർത്തിയെടുക്കുക വഴി വിജ്ഞാനത്തെ വിപുലീകരിക്കുകയും സമുദായത്തെ നവീകരിക്കുകയും പൊതുസമൂഹത്തെ ശാക്തീകരിക്കുകയും ചെയ്യുക എന്ന ലക്ഷ്യത്തോടെയാണ് 1990-ൽ അസ്ഹറുൽ ഉലൂം സ്ഥാപിതമായത്.

വിശ്വപണ്ഡിതൻ ഡോ. മുഹിയുദ്ദീൻ ആലുവായിയുടെ നേതൃത്വത്തിൽ വിജ്ഞാനപ്രേമികളായ ഒരു സംഘം സാമൂഹിക പ്രവർത്തകരാണ് അസ്ഹറുൽ ഉലൂമിന് രൂപം കൊടുത്തത്. ലോകോത്തര ഇസ്‌ലാമിക സർവകലാശാലകളുടെയും കലാലയങ്ങളുടെയും മാതൃകയിൽ സമഗ്രവും ആധുനികവും പുരോഗമനാത്മകവുമായ ഉന്നത വിദ്യാഭ്യാസം പുതുതലമുറയ്ക്ക് നൽകുകയാണ് അസ്ഹറിന്റെ പ്രഖ്യാപിത ലക്ഷ്യം.

അസ്ഹർ ഒരു ചരിത്ര നിയോഗം

പ്രവാചക നിയോഗത്തിന്റെ പിന്തുടർച്ച പണ്ഡിതന്മാരിലൂടെയാണ് യാഥാർഥ്യമാകുന്നത്. ജ്ഞാനികളായ പണ്ഡിതന്മാരുടെ അഭാവം വിജ്ഞാനത്തിന്റെ ചൂഷണത്തിനും സമുദായത്തിന്റെ സാംസ്കാരിക അപചയത്തിനും കാരണമാകും. എല്ലാ മേഖലകളിലും വിജ്ഞാനം വികസിക്കുന്ന ഈ കാലത്ത് സമുദായത്തെ നയിക്കാൻ കെൽപ്പുറ്റ പണ്ഡിതരെ വാർത്തെടുക്കുന്ന ഉന്നത ഇസ്‌ലാമിക കലാലയം മധ്യകേരളത്തിൽ ഉയരണമെന്ന ചിന്തയാണ് അസ്ഹറുൽ ഉലൂമായി രൂപം കൊണ്ടത്.